غصبوو بنتهم على الزوااج وشووفو وش النتيجه

من طرف المرحه 2008-10-06, 5:46 am

اليوم أحب أقدم لكم قصة ( على لسان فتاة ) حدثت في الواقع المرير ,,

قصة بأسلوب رائع وكوميدي ,,,

البداية : -

قدر الله علي وتقدم لي إنسان ما ادري من وين جايبينه أهلي (شكل أبوي دافع له عشان يخطبني)

وفي يوم اغبر .. ناداني أبوي ... وقال لي بالحرف الواحد (اليوم جاء واحد خطبك مني ..
وانا اشوفه مناسب .. بعدين انتي طولتي عندنا ) << حشى جبنه مو بنت

جيت ابي افتح فمي وأتكلم .. قال (التفاصيل تلاقينها عند أمك )

طيب (آآآآ ..) قطع كلامي ( وين القهوه ياولد ) << يعني اذلفي

سحبت رجليني اللي مو شايلتني ما ادري من الفرح ما ادري من الروعه
ورحت لأمي اللي كانت تتابع الحاج متولي للمره التسع تلاف مره
(يمه ابي اكلمتس بموضوع )
(وشو موضوعه )
(وش قصة هاللي خاطبني ؟)
ردت وعلامات الدهشه المصطنعه على وجهها

(هو خاطبك احد ؟) << تموت امي بالخفاء ياقدمهااااا
(اي ابوي يقوله )

(هااه .. اجل علمك ابوك ) << توها تسأل هو خاطبك احد
(ايه ويقول تفاهمي مع امك )

(وش تتفاهمين معاي فيه وش دخلني منك لابوك ) << ديموقراطيه بائسه

( ابوي يقول روحي لامك وانتي تقولين روحي لابوك .. طيب ماودكم تعلموني
شي عطوني رقم الرجال وانا اكلمه )

(اقول انثبري بس واستحي وش تبين تعرفين ؟؟ الرجال ماعليه ولد ناس ويصلي
ونشوفه مناسب بس انتبهي تعلمين احد والا تقولين لبنات عمك والا صديقاتك اعرفك ستر عنز )

( وش عنزه وشو تيسه ,, انتم تشوفونه مناسب بس انا ما اعرف للحين وشو ؟ وش
هالكلام مين اللي يبي يعرس انتم والا انا ؟)

(وتبين تعرفينه بعد هذا اللي ناقص انا من بديتي تتنحين على هاالترترنت وانا
غاسلتن يدي منك ,,,العلم وجاك والرجال يبي العرس بعد شهرين يمديك تفصلين
لش دراعتين وتتقضين )

<<وقسم حسيت اني وضحى وابن عجلان

( طيب وشو ؟ منهو ولده وش يشتغل ؟ ؟ واهم شي ابي اشوفه )

(تشوفينه ؟؟؟؟ هذا اللي ناقص بس علينا !! مابه شوفه الا بعد الملكه )

(اذا تملكنا مالكم منه باشوفه وباطلع معه بعد .. الحين ابي اشوفه عشان
احدد فيه ملكه والا لا )

المهم

اني انمسح بي سيراميك البيت كله ذاك اليوم .. ولكني اصريت على موقفي ..
رغم التنكيل والحرمان من الدش والنت .. وانتصرت اخيرااا (( يبون الفكه مني ))

وبعد مداولات قال ابوي
(اسمعي ابخليك تشوفينه عشان ماتقولين ان حنا رجعيين <<<قل قســـم
راح اناديه واخليك تطلين عليه من الدريشه )

(قلت لامابي ابي اشوفه مثل الناس ويشوفني )

وبعد صوت مدوي كان مصدره ارتطام يد ابوي بخدي ... قلت طيب دريشه دريشه ..

نصف العمى ولا العمى كله

وتحدد يوم الدريشه .. وكنت على اعصابي ابي اشوف فارس احلام اهلي وش شكله ؟

وجاء اليوم المشهود .. وقمت من صلاة الفجر افكر في هالشوفه .. تصدقون اول مره
اعرف ان الوقت من الفجر للمغرب طويـــــــــــــــــــــــــــل .. بغيت اموت ما أذن المغرب
واخيرااا اذّن المغرب وارسل ابوي اخوي لي .. وجاني مدرعم

(يقول ابوي ترى القهوه بعد عشر دقايق ) << قل قسم

فهمت طبعا انه بيجي بعد عشر دقايق وانقز لدريشة غرفة اخوي اللي تطل
عالباب الخارجي .. وبعد ربع ساعه رن الجرس ابد ابــــــــــــــــــــد ماطاح قلبي برجولي

وشوي الا يدخل ذاك الشاب الوسيم الطوويل العريض اللي شوفته تجيب العافيه
ورحت وسكرت باب غرفتي علي .. وبدت احلام اليقضه ما دريت الا امي تطق الباب و
انا قد صار عندي ولدين ومسافره لباريس (احلام يقضه )

قالت امي ( هاه شفتيه )

سويت نفسي مستحيه
(ماشفت شي دخل بسرعه بس انتم اهلي وادرى بمصلحتي ) << اي هين

امي طلعت فاهمتني .. تبسمت
وبس طلعت امي .. كانت كل الشله والشلل المجاوره لها عرفوا عن خطوبتي << ستر عنز
ومرت الايام .. ودارت الايام .. ودفع الرجال المهر وقال ابي العرس بعد شهرين بالعطله

قلت لامي (شهرين موب واجد ؟)
ماردت علي .. بس فهمت وش تبي تقول
(قصدي مو شهرين شوي ما اقدر اجهز بس بشهرين )
ردت (اقول اذلفي عني )

وبديت اجهز .. وكل شوي طالعه السوق .. وناسه .. فلوس واشتري اللي ابي
ما احد يقول لي وين رايحه وليه متاخره

..المهم مر شهر وانا قمة الفله ..

وامي كانها بدت تدلعني شوي يوم حست اني باذلف فعلا.. ومر اجمل شهر بحياتي ..
وفي يوم اغبر من ايام خطبتي كنت توي جايه من السوق .. الا اخوي واقف عند
الباب ومعه واحد اشهب وشوفته تجيب البلهارسيا .. شكله طرار دخلت البيت
ودخل اخوي بعدي .. يتبسم وقال
(ايوه .. من قدنا .. اموت انا على حركات الحب والنظرات من بعد )

(عسى ماشر .. وش فيك ؟ شكل هالمحشش اللي انت واقفن معه معطيك شي )

(ايوه يعني ما احبه .. يابنت مكشوفه انتي شكلك بتنهبلين عليه .. مع اني للحين
والله ماني عارف وش محببك فيه ..

بس وافق شنن طبقه )

( وشو حبه .. وشو طبقه ..هييييييييييه وش فيك )

(يعني اني ما ادري من اللي واقفن معك ...يابنت مو علي )

(من اللي واقف معاك ياكونان)

(خطيبك)

(خ..طيبي)

(ايه)

(..بالله هذا شكل خطيب ..هذا استبنة شيروكي ... اقول بلا مزح ثقيل
ماني رايقة لك ..خطيبي مو هذا)

(مو هذا؟..احلفي عشان اصدقك ..هيــــــــــــــــه هذا خطيبك والله لو اني ماصبيت
له القهوه ذاك اليوم كان اصدقك ..)

(احلف..)

(والله )

(لا انت تستهبل صح.. مو هذا اللي شفته ..انا شفت واحد طويل مزيون ابيضاني ..
مو هذا قسم )

(خخخخخخ لاتصيرين بس شفتي صديقي مشاري.. تراه ذاك اليوم جاي قبله بخمس دقايق)
يعني هذااااااك خطيبي استبنة الشيروكي هذا هو خطيبي ؟؟

مسسسسسسسسستحيل

ورحت اركض لأمي

(يمه صدق اللي عند الباب هو خطيبي ؟؟)

(الحمد لله رب العالمين..وش فيك ..وشو بابه ..وشو خطيبه )

(الاستبنه اللي برا هذا خطيبي؟؟؟)

(اقول انتي عليش قلّ صح ؟وش فيك عمى)<< ويبونا نصير ناعمات وحنونات

(قولي لي اللي برا صح خطيبي والا بندر يمزح؟؟)

(وش دراني انا..اصبري اساله وبعدين لاصار خطيبش وش عاد..

لاتكونين تبين تقعدين معاه بعد..تراش تسوينها)

(الله يرحم والدينك مو وقتك..شوفي هو هو والا لا)

نادت امي اخوي بندر وسألته وطلع صح هو..واللي شفته مشاري صديق بندر
استجمعت شجاعتي (لاني عارفه وش بيصير لي) وصرخت

(لاااااااااااا ما ابيه ..ما ابيه..مو هذا اللي شفته)

الكل وقف مذهول يطالعني ..وامي نقزت وحطت يدها على فمي
(انطمي لا يسمعك ابوك)

ابعدتها عني

(لا مو هذا يمه..ماابيه مستحيل اتزوج الشي اللي برا هذا..مستحيل )

(اقول يوم دفع وصرفتي قريشاته وعطيناهم كلمه واستعد الرجال
جايه تقولين ماابيه

وش نقول للناس؟؟ الرجال لعبه عندك ؟؟ ما اعجبك ؟؟اقول اسكتي بس
لايسمعك ابوك وتصير نهايتك الليله )

وبالصدفه قربت نهايتي.. لاني سمعت صوت ابوي وراي

(وش فيه..صوتكم جايب اخر البيت..حريقه؟؟والا مات احد ؟؟؟)

وقف قلبي من الخوف..
ايه..يوم يجي ابوي على صياحي
وعرف ابوي ان السالفه تتعلق بي
وقتها كنت منهاره وجالسه ابكي

(مااااااااابيه ....ماااااااابيه )

سأل امي وش السالفه؟ وامي طبعا علمته السالفه بالبهارات

(وش هالحكي؟؟..وشو اللي ماتبيه؟؟؟ نلعب حنا)

(تقول انه ماهوب هو اللي شافته)

(من شافت اجل؟؟ ووين شافته)

(حصل غلط وشافت صديق بندر بدل ماتشوفه هو)

(وان شاء الله تبينا نروح نجيب لها صديق بندر )

(اطلعوا وخلوني انا واياها)

ساعتها حسيت ان الاستبنه ارحم من اي شي ممكن يصير لي الحين
طلعت امي وبنيدر الله لايعيده لا هو ولا صديقه..وفجأه تكلم ابوي
بهدووء
(تعالي وانا ابوك اقعدي)
بصراحه حسيته ملعوب يبيني اقرب عشان بتوطاني ماقد شفت ابوي حليل كذا
(تعالي قلت لك)<< ايه اكذا انت ابوي الحين اقدر اجي

وقعد يسبحن علي ويحاول يقنعني ان الشكل مو مهم وان الرجل مناسب واهله
ناس مستورين وان الحين ماعاد فيه رجال والبنات قامن يخطبن الرجال
والمحظوظه اللي تلاقي لها رجال يضفّها<< ملحق مو بنت

وكل ماجيت احكي..قال خليني اكمل..

خليته لين قال لي كل اللي ببطنه ..

بعدين قلت

(بس انا ماابيه..لو اقعد طول عمري ما اعرست ما ابيه)

حسيت لون ابوي تغير اقرب ماله البنفسجي ..يعني تراها ماهي سهله عليه يقعد
ساعه وهو هادي حسيت انه كان ضاغط على نفسه جداا والدليل اللي بتسمعونه
الحين

(اقول..اسمعي..علمن ياصلك ويتعداك.. الرجال وبتاخذينه..والملكه وبعد اسبوع
على موعدها وكانك بنت رجال سوي شي بس والا قولي لا)<< ماحبيت اهزأه فسكتّ

طبعا طلعت ابكي..واصرخ.

ماااااااابيه.. ابذبح روحي قبل اتزوجه..لو تموتون ما اتزوجه......الخ

وما من مجيب ...

سويت اضراب عن الأكل والشرب..ولا جاب احد خبري..نقلوني للمستشفى
في حالة هبوط ضغط..وحنا راجعين من المستشفى قال ابوي ..

(اسمعي والله لو اشبك بك مغذي لين تعرسين بتاخذينه بتاخذينه ماعلينا
قاصر فشايل مع العالم)

والله ساعات ياناس احس ان اهلنا متبنيننا من ملاجيء..والا مانين علينا
انهم اهلنا

قلت له

(والله لو اني مسويه لكم فضيحه وبتسترون علي كان اعذركم..بس حرام
عليكم هذا جزاي ماشيه اباري الساس)

رد علي

(بعد بعد.. لو انك ماتبارينه كان الحين تحت التراب)
المهم

تحددت الملكه ..

وجاء اليوم النحس لارحت تزينت ولاسويت اي شي..

وامي بس تروح وتجي علي

(يابنتي..قومي عدلي خشتك..حطي بودر..مشطي
هالشوشه الرجال يبي يجي وانت كذا)

(ماابي..ولاني طالعه لأحد..ولا متزوجه احد واللي تبون سووه)

(يابنتي ادحري الشيطان..والله ان يدفنك ابوك هنا..)

(يدفن..يسوي اللي يبي..والله كني على قلوبكم..حرام عليكم)
وجلست ابكي وكأن امي حنت شوي

بس مازالت مصره

(خلاص قومي غسلي وجهك ومشطي شوشتك )<< وش رايكم بأمي بس ؟

وجاء المغرب..<<<<<<<<< اكررررره هالوقت الله ياخذ مشاري

وانا اسمع قرقعه ورجده تحت..

وبيني وبينكم كنت مرعوبه حتى الموت..بس يقال لي باصمد واتمسك بحقي
اللي يكفله لي الشرع

طق الباب والا هو ابوي

(اسمعي..الشيخ يبي يجي بعد شوي..لا سألك ترضين قولي ايه..
وبعدين الرجال يبي يشوفك..والله ثم والله لو خبصتي لايصير شي مايرضي احد)

حسيت وقتها بالظلم .. بالقهر..بكل انواع الاحاسيس اللي ماهي بزينه وفكرت..

قلت وربي هالأستبنه ارحم من هالأهل..وقررت اني اواجه مصيري الاسود

قمت ومشطت شوشتي ولبست طقم اسود..ولا حطيت على وجهي اي شي..

فجأه..قالوا لي الأستبنه يبي يشوفك يالله عشان تدخلين عليه..

دخلوني على الكائن الفضائي اللي المفروض يصير زوجي.. يوم شفته حسيت ....

بس قلت في نفسي هذا خلاصك من بيتكم..يمكن يطلع اخلاق لاتستعجلين ..

جلست بعيد عنه..وجلست اطالع صندلي(وانتم بكرامه)اكتشفت ذاك اليوم ان

صندلي فيه كرستاله موف...شوي الا ابوي واخواني طلعوا..
نقز شين الوجه جنبي (تسيف الحال؟)
(الحمد لله)

(ماشاء الله عليكي جميله)<< اقول انكتم بس

(وش تشجعين؟)

(طيب..تعرفين تطبخين؟)

اول مره احس اني ودي اصفق احد فعلا

(مستحيه .. زين احسن من بنات هاليومين منزوعات الحيا)<< تقرب له امي

اكرررررررررررهه...

والله اكرررررررررررررهه

ماقدرت اتحمل طبعا

طلعت وخليته..رحت غرفتي والدنيا سوداااااااء زي صندلي

جاء بكرا ...

قمت من النوم على صوت جوالي يدق..طبعا ماقدرت انام الا بعد ماطلع
النور..والتليفون رن الساعه عشر الصباح..

(نعم )

(صباح الخيررر..عرفتيني )

لاااااااااااااااا رحماك ربي

(مين معاي )<< وانا عارفه

(انا (الأستبنه))

(......)<< يعني ساكته يا الله صباح خير لاشر فيه

(ايه حبيبتي وش لونك)<<<<< لاااااا لااااااااااااااا يسمع الاخ بالحب

(لو سمحت انتبه لألفاظك..؟)

(ياسلام على اللي يستحون..احب البنت الجد)<<حسيت انه راعي مغازل ما ادري ليه..؟؟

(تبي شي؟)

(لاحبيت اصبح على ام عيالي)

الله لايقوله ولا يكتب لي جراذي منك

حامت كبدي بجد..صار كل يوم ينقز لنا بالبيت ..

وتليفوني سكرته من كثر ازعاجه وكل يوم كرهي له يزيد...

كلمت امي قالت خلاص انتي الحين متزوجه يعني اي شي بتصيرين مطلقه..

انسي انسي حكاية انك تتركينه..

فقدت الأمل..حسيت ان كل الابواب متسكره..اهلي ماعندهم تفاهم..وعريس الغفله
لو جلست معاه يوم واحد راح اموت من القهر..وين اروح وش اسوي

حسبي الله عليك يا مشااااااااااااااري

وقرب موعد الزواج..وانا كل يوم يزيد حالي سوء..نقصت 10 كيلو..

صرت عظم وجلد

اطالع نفسي في المرايه..والله مابي شي شين عشان يرموني اهلي هالرميه
يعني عشان ما اعنس ..طيب خير ياطير

جلس ابوي يرفض يرفض وبدون مايعلمني..ويوم الناس اكلوا وجهه رماني
هالرميه

المهم قرب يوم الزواج ..

كل يوم يمر احس ان نهايتي تقرب ..والله ما ابيه مااااااااا ابيه..مستحيل
اتزوج هذا..ما اتخيل نفسي معاه..لامصيبه هو طايح علي طيحه شينه..كأنه
ماشاف نعمه

وقبل الزواج بيومين دخل علي اخوي بندر..كنت جالسه ابكي..

وحابسه نفسي بالغرفه جلس جنبي ..لأول مره احس ان احد من اهلي قريب مني..

(وش فيك..؟ للحين ماتبينه؟)

(انت عارف )
وش فيه طيب ؟ مستور وطيب لايدخن ولايشرب صحيح ان دمه واقف بس الرجال
شاريك وحالته ميسوره مدرّس راتبه زين)<<اكره المدرسين

(بندر..ما ابيه..ما ابيه حسّوا فيني حرام عليكم)

(طيب انتي بتتزوجينه لازم تتأقلمين )

(ما اظن اعمّر معاه..يا بموت..يا بذبحه..يا ارجع لكم بشناط العرس)

(متأكده انك ماتبينه؟ متأكده تقدرين تتحملين لقب مطلقه؟؟؟)

(اتحمل اي شي يابندر بالدنيا الا وجهه)
(للدرجه هذي)

(اكثرررر يابندر اكثر)

(فيه في بالك احد ثاني غيره)

(لاااااا مافي بالي احد..بس ما ابيه)

وطلع بندر...نصف ساعه الا اسمع برا صوت ولجّه وحوسه..انفتح الباب علي
فجأه الا هو ابوي ..دخل ووجهه تعابيره غريبه

(انتي للحين مصممه انتس ماتبينه )

(لآخر يوم بعمري)

(وتبين ترجعين لنا مطلقه؟؟)<<< قل قسم!!

(هذا اذا ماذبحته والا ذبحت نفسي)

(طيب)

وطلع
بصراحه انا صرت كذا

المهم

جلست بغرفتي اترقب..اسمع حوسه..شوي الا ناداني ابوي..

بالمجلس حصلته هو وامي وبندر..

(اسمعي هذا بندر اخوك..يقول انك بترجعين لنا مره ثانيه..

وانتي معزمه ماتبينه ويقول انه بيوقف معك..وانتي بوجهه)<< حرب البسوس حشاا

(انا ابي مصلحتك واشوفه مناسب لك..لكن اذا الدعوى بتوصل للطلاق قبل الدخول..

انا مابي باكر ترجعين لنا ومعك بزران مطلقه)<< وش صحوة هالضمير

(وبعدين الموضوع وصل لعمك ناصر وتوه مكلمني..اخوك علمه)

اهاااااااااااا الدعوى فيها عمي ناصر..وين كان غايب عني كل هالمده
والله اني دجاجه..اعرف ان ابوي يخاف ويحترم عمي ناصر كثيرررر كيف
مافكرت الجأ له؟؟؟؟؟؟؟؟؟

كم اناااااااا غبيه

المهم ما ادري وش سوى بنيدر هذا وخبص السالفه وخلى ابوي يلين..قام
ابوي اتصل على الأستبنه وحنا عنده

سلّم عليه وفهمه بهدوء ان الزواج قسمه ونصيب وان مافيه نصيب و بنرجع لك
كل اللي دفعت وكل واحد يروح بحال سبيله...

فجأه تغير وجه ابوي..وقام يصارخ( وش هالحكي ..وتقوله قدامي بعد؟؟

البنت ماتبيك..وحنا اللي غاصبينها

ترضى على نفسك تتزوج وحده ماتبيك..؟؟

دام هذي علومك اجل خيره اللي كلمناك الحين..بيننا وبينك الشرع)

وسكّر ابوي السماعه..سأله بندر وش فيك يبه وش قال الرجال؟؟

قال ابوي وعينه بالارض:

(يقول ماني بمطلق.. لو ادخل عليها يوم بس بعدين اطلقها)
اتصل ابوي على الشيخ وسأله؟ قال اذا البنت ماتبيه ترجّع له مهره ويفسخ العقد
غصبن عنه

وفعلا ابوي تحمس واخذ الموضوع عناد..
وطلقوني منه قبل زواجي بيومين...

والحين انا مطلقه ..وانا ماتزوجت<< يمديكم

انحسبت علي تجربه..وانحسب علي لقب كريه..وتوابع ل اللقب هذا بدون اي

اختيار او ذنب

لانفع ابوي ندمه...ولانفع امي سلبيتها...ولانفع كل اللي سويته..

ولو ماوقف بندر معاي كان الحين ما ادري ايش حالي ,,,,

النهاية ,,,,,,,,,,,,

اتمنى القصة نالت على اعجابكم ,,,,

م
ن
ق
و
ل